من جديد

البوست ده انا كنت نزلته فى البلوج من زمان ... من كتر ماهو عاجبنى انا نزلته من تانى لان المواضيع القديمه بتتنسى .. ياريت يعجبكم

حاول تعرفها .. هى يمكن غريبه شويه و غامضه شويه بس لو قربت منها هتشم عطرها زى ورده بتتفتح فى الربيعحاول تلمسها .. ايوه حواليها شوك بس شوك مش بيأذى غير اللى عايز يأذيها و انت اكيد مش عايز تأذيها حط ايدك عليها .. المسها اكيد هتحس بيها لو لاقيتها ماشيه لوحده او فى عنيه ابتسامه اعرف انها كانت مع حبيبها .. لو لاقيتها بترد على التليفون و وشها كله خجل اعرف انها بتكلمه و هو بيقولها بحبك او كلامه كله غزل هتلاقيها و هى قاعده حاضنه طفلها .. خايفه عليه من الهوا .. بتضمه ليها اوى كأنه عاوزه تدخله جسمها تانى بس عشان تحميه من العالم اللى بره او من النسمه البيسطه هتعرف اد ايه هى انثى لو لاقيتها شايله هم كبير فى قلبها .. و برضه لسه فى قلبها مكان للحب و لابتسامه للراجل اللى بيجى يشيل الزباله من قدام الباب الصبح .. هتعرف يعنى ايه انثى

انا بقي شوفتها و حسيتها و لمستها فى برأه الاطفال لاقيتها بتعدل حجابها فى مرايه العربيه اللى راكنه على الرصيف و لما لاقيتنى براقبها اوى اتلخبطت من الخجل و كانت هتقع و هي ماشيه انا لمستها لما خدتنى فى حضنها و انا بعيط و حسيت اد ايه ان الحضن ده هو الدنيا كلها و ان مكانى فيه انا عرفتها كويس هى رقيقه حتى لو كانت بتحاول تبين غير كده .. هى جميله حتى لو كانت مرايتها بتقولها غير كده.. هى هاديه حتى لو كانت بتحاول تبين انها شقيه عشان ماتتحرجش بين زمايلها لانها هاديه اوى انا اعرفها كويس لانى بشوفها من جوه .. هى جميله اوى من جوه و جمالها بيطلع على عنيها العسلى و خدودها الورديه و ابتسامه شفايفها