زمان حاجه و دلوقتى حاجه تانيه خالص

النهارده انا هتكلم عن ايام كنت بحبها اوى

زمان ايام الكليه كانت ايام حلوه اوى

مش اوى يعنى لان الايام اللى كنت بضطر اروح فيها الكليه كنت بركب القطار لمده ساعه و نصف تقريبا ( ده يعنى لو القطر شادد حيله شويه و بيمشى بسرعه ) عشان اروح كليتى فى مدينه طنطا (شالله يا سيد يا بدوى )وحياتكم قعدت فى طنطا دى تلات سنين ماعرفش فين السيد البدوى لحد بالصدفه ما عرفت ان هو الجامع اللى قريب من ميدان المحطه اللى بشوفه كل يوم و انا رايحه اركب القطر

اجمل حاجه فى طنطا انى كنت بشوف فيها اصدقائى .. الناس اللى مش لاقياهم دلوقتى .. بجد مش لاقياهم و مش عارفه العيب فيا انا ولا فيهم .. انا اللى كل مره بتصل و بسأل و ماحدش بيسأل عليا بصراحه يعنى غير سمسمه صاحبتى .. برضه من شله اصدقائى فى الكليه

كانت ايام جميله اوى ياريتها ترجع تانى

عارفين انا نفسي فى ايه دلوقتى ؟؟

نفسي اخرج يوم مع صحابي... نقعد على البحر .. نضحك مع بعض .. نلعب كوتشينه .. نتغدى كشرى .. نفسي الاقيهم بيتصلو بيا .. بجد نفسي الاقى حد بيتصل بيا يسأل تانى

نفسي الاقى حد يشدنى من دايره الاكتئاب اللى انا عماله الف فيها

زمان لما كنت بتضايق كنت بلاقى حضن ابكى فيه

دلوقتى مافيش حد جنبي

دلوقتى بقيت بقضى معظم الوقت على النت .. مش زى زمان .. دلوقتى و كتير اوى بلاقى نفسي فاتحه الاكسبلورر و سايبه الصفه فاضيه و عماله ابص لها .. حتى النت دلوقتى اتغير لان اصدقائى الكتير اللى كانو على النت فيه منهم اللى مابقاش يدخل و اللى غير ايميله و نسي يدينى الايميل القديم او اللى بيدخل عشان يخلص شغل و يطلع و قليل اوى لما حد بيدخل يقولى ازيك يا داليا

يلا .. دنيا و هو ده حالها

الحمد لله