حاجه غريبه
حصل موقف غريب اوى من كام يوم
كنت راكبه الميكروباص و رايحه مشوار و قدامى كان راكب بنتين عاديين يعنى و كانو قاعدين يتكلمو واحده فيهم مخطوبه و عماله تكلم صاحبتها على الشقه اللى هتتجوز فيها و الحاجات دى يعنى و بعدين اول ما قربنا نوصل راحت البنت المخطوبه عملت حاجه غريبه اوى
قلعت الدبله
و حطيتها فى الشنطه و قالت مالهاش لازمه دى بقي
انا قعدت مستغربه اوى و قولت فى نفسي لما دى تبقي مالهاش لازمه اومال ايه اللى ليه لازمه ؟؟
لا يعنى بجد الدبله مالهاش لازمه فى ايد البنت ليه ؟؟
و ياترى صاحب الدبله كمان مالوش اى لازمه؟؟
طيب هى كانت رايحه مشوار مهم يعنى يستلزم انها تبان مش مخطوبه ؟؟
يا ستى لو زهقانه منه اوى كده سيبيه يا ماما ولا هو ضل راجل و خلاص
شكلها يا عينى ما صدقت تتخطب بس اللى مابتصدق تتخطب دى بتمسك فى الدبله بأديها و سنانها
ولا يمكن قلعتها احتمال تلاقى فرصه احسن ؟؟
مهما كانت الظروف و الاسباب (ماعتقدش انها قويه يعنى)يخليها تقلع الدبله بتاعتها
بكل استهتار عملت كده كأنها بترمى كيس شيبسي فى شنطتها بعد ما كلته عشان مش ترميه فى الارض
حسيت انها هترمى الدبله فى الارض بس تلاقيها شالتها لحد ما تلاقى اى صندوق زباله ترميها فيه
يا جماعه هو الموضوع عادى كده ولا انا اللى مكبراه حبتين ؟؟
32 comments:
السلام عليكم ورحمة الله وبركاته
انا شايف انك مكبرة الموضوع شوية لسبب بسيط
انك متعرفيش اصلا البنت دي
وبالتالي متعرفيش هي بتفكر ازاي او تربتها ايه او نظام حياتها ايه
لكن عموما يعني البنت اللي تعمل كده من وجهة نظري بتكون مخطوبة غصب عنها او مبتحبش البني ادم اللي خاطبها
وف الحالة دي الله يكون ف عونه هو
ايوة متستغربيش الله يكون ف عونه لانه مغفل
وعلى فكرة مغفل دي مش شتيمة انا اقصد معناها اللغوي الصحيح
تقبلي تحيتي
عندك حق..الدبلة -عند البنات بالذات- معناها كبير اوي...معانهاارتباط وحب ومعنى جديد للحياة اكتر من كونها دبلة او حلية دهب
لو استغنت عنها بالسهولة دي يبقى هتستغنى عن صاحبها بنفس السهولة وفي اول فرصة
تحياتي
ليكي
محمد سمير
بصي يا دوللي انا عايز اقولك ان ممكن يكون فيه اكتر من سبب للي هي عملته ده منهم حاجات معناها انها محترمه ومنهم حاجات معناها انها مش محترمه وانا هاقولك مثالين واقعيين انا عارفهم للي حصل ده وهتفهمي منهم ايه ممكن يكون سببها
الموقف الأول للبنت المحترمه اللي عارفه ان رئيسها في المكتب عايز يعتبر السكرتيره دي زي اللي بيشوفهم في الأفلام يعني تسيبه يعمل اللي هو عايزه ويدايقها ويتحرش بيها وعشان هي مضطره تشتغل وفيش قدامها حاجه تانيه كان الحل انها تفهمه انها اتخطبت وخلاص هاتتجوز ولازم طبعا الدبله في ايدها لكن وهي مروحه متقدرش تدخل البيت على اهلها وفي ايدها دبله عشان ميظنوش انها على علاقه بحد وجايبلها دبله من وراهم فطبيعي وهي داخله البيت تقلعها وتقول مالهاش لازمه
الموقف التاني
واحد اعرفه بتاع بنات وعايش على هواه ربنا يهديه يارب المهم انه يعرف شاب تاني عايز يجرب يمشي مع بنات ونساء في علاقات زي اللي بيسمع عنها من اصدقاءه طبعا الفالح التاني عرض عليه ان يخلي صديقته تجيب معاها اي بنت تعرفها وهي جايه
عارفه بمجرد البنت ما دخلت قالت ايه قالت الله يخرب بيوتكوا ده اعز صديق لخطيبي ولو شافني يبقى انا رحت في داهيه
يعني البنت مخطوبه ومع ذلك معندهاش مانع تيجي تتعرف على واحد في شقه طبعا انا معرفش اللي انتي شوفتيها كانت انهي في الأتنين لكن اللي عايز اقوله ان الدنيا دلوقتي بقى فيها كل الأصناف حاولي متستغربيش من اي حاجه خالص
اتفرجي واتعلمي واسكتي
سلااااااااااااااااااااااام
انا بصراحة مع كاسبر فى اللى قاله واتصدمت جدا من اللى شنكوتى حكاه
ولكن البنات وعاداتهم فى الوقت الحالى بقت ملخبطة قوى - متحاوليش تحكمى على حد لمجرد الرؤية أوقات الظروف بتفرق كتير قوى فى المواقف
تحياتى يا دودو
هبة
لا ربنا يستر علينا وعلى ولايانا هو موضوع كبير ومش مكبراه ولا حاجة والموضوع اكبر من كده كمان
انا اعرف حلات انيل من الى شنكونتى حكها
والموضوع مش طبيعى لا بس احنا الى من كتر ما شوفنا الاوحش بقينا متعودين على الوحش
لا البنات اتغيروا قوي
انا لما كنت اعرف بنات كانت البنت تقول بس هو ييجي
دلوقت خلاص اتنمردوا والعرسان كتروا ف اديهم
ده الواحد كتر خيره انه لسه عايش
sooo bad
صحيح انا برضوا مع كاسبر فى انك متعرفيش البنت دى ومتعرفيش هيه عملت كده ليه
واكيد اذا عرف السبب بطل العجب
وربنا يهدى
والله مش عارفه يا داليا
انا لو كنت شوفت الموقف ده كنت اتصدمت زي ويمكن اكتر منك كمان
بس مش عارفه ليه جه في بالي حاجه
يمكن عشان كنا بنتكلم في حاجات زي كده انا وصاحبتي امبارح
وهي انه ساعات لما بيكونوا اتنين بيحبوا بعض وبتبقى البنت مش عارفه ازاي تخلي اللي بتحبه يحس انها هاتضيع منه..ف تحسسه انها هاتروح منه بنظام انا متقدملي واحد..وممكن كمان تكمل الحكايه وتلبس دبله كنوع من انواع التخويف
بس مش عارفه هو الموضوع كده ولا لا
انا عندي واحده صاحبتي...هي وواحد كان بيحبوا بعض لمدة 10سنين..
من وهم عندهم 15 سنه
في الاخر اكتشفت انه خاطب بقاله كتير...
وكان لما بيقابلها بيقلع الدبله ويحطها في جيبه
:))
يلا الدنيا مليانه...اللهم اعف عنهم وعافنا
ما غريب الا الشيطان يا قمر
ما هو يا اما يكون واحد هيه استهبلته خالص
يا اما هى اللى أخلاقها نص كم
يلا .. ربنا يسهل لعبيده
kasperb4
انا بس مستغربه من الموقف نفسه
وبعدين اللى خاطب واحده و مابتحبهوش او غصب عنها المفروض يفهم و يسيبها
بس من كلامها مع صاحبتها ماكنش باين خالص انها مش بتحبه او غصب عنها
----------------------------------
غمض عينيك
فعلا يا محمد
و على فكره الدبله مش مجرد دهب
انا اعرف واحده ظروفها الماديه كانت صعبه و باعت دبلتها و جابت دبله فضه .. المهم تكون لابسه دبله
-----------------------------------
الشنكوتي الكبير
انا مش عارفه بصراحه اللى انت بتقوله ده غريب اوى
ربنا يستر الايام اللى جايه مش عارفه هيحصل فيها ايه اكتر من كده
-----------------------------------
Doba
انا مش حكمت عليها يا هبه انا بس استغربت اوى من اللى هى عملته
----------------------------------
Dr-hema
معاك حق يا دكتور الموضوع كبير فعلا
-----------------------------------
.:.-=- ELGaZaLy-=-.:.
افظع من كده كمان
لا بجد ده كتير اوى
ربنا يحفظنا
-----------------------------------
ولــــــــــو
اه فعلا البنات اتنمردو اوىىى
-----------------------------------
بنت أبيها
بس ياريت يكون السبب مقنع
ربنا يهدى
-----------------------------------
warDaya
انا برضه عارفه الموضوع ده يا وردايه
بس البنت كانت بتكلم صاحبتها على شقتها و انها عاوزاها معاها تفرشها
تفتكرى يعنى تكون بتعمل كده عشان واحد تانى ؟؟ استحاله طبعا
ازاى واحد يكون بيحب واحده 10 سنين و فى الاخر يخطب غيرها
الرجاله دى غريبه اوى
-----------------------------------
voice of love
ازيك يا جميله نورتى
انا مش عاوزه اسئ الظن بحد بس فى نفس الوقت انا مش قادره افهم هى عملت كده ليه
البنت ديه مستهترة لأن ببساطة مفيش حد لاقي يتخطب الشباب مش لاقيه شغل يعني المفروض أنها تحافظ على خطيبها ولو هي مش عايزاه تتخلص منه مش تتجاهله وتحط الدبلة بتاعته في شنطتها كأنه صباع روج أو إيشادو
السلام عليكم
يا اخوانا بداية طبعا نحن لا نعرف الغيب ولا نظن ظن سىء وكاتبة التدوينة تعرض الأمر وياريت كانت وجدت لها عذر لكن اعتقد ان طريقة كلام البنت واسلوبها فى الكلام هو ما دفعها لتعتبرة موقف مش عادى
لا طبعا الموضوع مش عادى وكبير كمان لان هذا رمز وليس مجرد دبلة فى اليد يعنى انا اتصور انك داخل جامع مثلا فتقوم تلبس كويس وتنظف نفسك وبعدين اول ما تخرج منه تقوم رامى نفسك فى الوحل علشان وقتة مجاش او علشان تجارى جو معين انت رايح له
فعلا نزعت الأمانة
يارب يعافينا
ياعم الحاج الاحترام يفرضة الشخص وليس الدبلة وان كان المدير قليل الادب يبقى بناقص اكل العيش فى المكان دة وربنا يرزقها من مكان تانى وكمان لا اعتقد ان فى حاجة اسمها غصب عنها اليومين دول يعنى اللى تخرج وتجوب الشوارع مع زميلتها هتتخطب غصب عنها ازاى وبعدين لما تشوفى حاجة ولا تعجبك اوعى تسكتى قولى وفضفضى وانقضى حتى ولو بينك وبين نفسك علشان نحس ان لسه فينا خير
تحياتى
البنت لما تلبس خاتم عادي
?يفرق إيه عن الدبله
أنا واحد ما بفرقش بين الدبله و الخاتم
:S
فكرة الدبلة عند الناس كلها حاجة مقدسة بالنسبة للولد او البنت وقلعها بالشكل ده يخليني استغرب زيك بس في الوقت اللي احنا فيه ده الاستغراب مش هيطول لأن في ناس كتير دلوقتي بيميزهم استهتار شديد بالمشاعر ده مش كده وبس ده كمان مبيعرفوش قيمة الحاجة و معناها الحقيقي علشان كده اتحولت الدبلة لحاجة بنتباهى بيها ونقلعها وقت ما احنا عايزين
تحياتي
ده تطور ورد فعل طبيعى لجواز الصالونات
لأن هى لو بتحبه فعلا مش هتعمل كده
ببساطة يعنى
لا
انت مش مكبرة الموضوع ولا حاجة
فعلا هو صاحب الدبلة مش فى دماغها اصلا
والعينات دى فى منها كتير
هى لو بتحبه فعلا كانت دبلته دى تكون معاها لو حتى بتموت متخلعهاش من اديها
لكن نعمل اية ؟
البنات خلاص باظت
طبعا مش كلهم
شماعة
معاك حق انا برضه شايفاها كده
بس الله اعلم بظروفها
-----------------------------------
الطائر الحزين
بصراحه كل اللى قولته صح .. و بالفعل الموضوع مش صغير
-----------------------------------
nickname
لا طبعا تفرق كتير الدبله مش مجرد دهب لابساه دى حاجه بتربط بينها و بين الشخص اللى هتقضى معاه باقيه عمرها
اكيد انت بتهزر و بتعرف تفرق بين الدبله و الخاتم و لو مش عارف الصوره اللى انا حاطاها فى البوست دى دبله و اى حاجه تانيه تبقي خاتم
-----------------------------------
انا حر
الدبله دى تعتبر الحاجه الوحيده اللى بتربط اتنين مخطوبين
مش عارفه الاستهتار بقي عادى كده؟؟
-----------------------------------
Mirage
مش كل زواج الصالونات يا ميراج فيه ارتباطات بتنجح جدا
الاهم من ده التربيه
-----------------------------------
Ahmed Moghazy
طبعا مش كل البنات
ربنا يهدي
عزيزي المدون: ها نحن نفتتح بين أيديكم مجلة إسمها المُدوّن
سعيا منا في المساهمة في إقلاع ثقافي يهدف إلى تحقيق تنمية شاملة، وعلى جميع الأصعدة
المُدوّن
رؤية ثقافية تنقلك إلى آفاق لذة القراءة والمتعة والفائدة
فندعوك لتصفحها.. ونرحب بك صديقا وفيا ومراسلا مثابرا
فأهلا ومرحبا بك
--
مجلة المُدوّن
http://al-modawinmag.blogspot.com
أسمحلي اختلف معاك يا ميراج...
طريقة الجواز طالما محترمه..والبنت والولد محترمين..ماحدش هايعمل كده..بجد بتعتمد على التربيه واذا كانت الشخصيه سليمه ولا لا..
الجميله داليا
انا متفقه معاكي في انها لو ماكانتش عايزه تتخطب ماكانتش من الأول توافق طالما رضيت انها تحط اسم واحد علي خاتم و لبسته يبقي علي الأقل تحترم اسمه
لكن انتي عارفه عزيزتي بنات كتيره عائلتهم متشدده و بيغصبوهم علي الجواز فممكن تكون من النوعيه دي
انا شايفه انها لو مش مقتنعه بخطيبها تتكلم مع اهلها وتشرحلهم وجهه نظرها لكن قلع الدبله مش هو الحل
تحياتي علي الموضوع المعبر
:)
ليه متقلعش الدبلة ؟؟ يمكن تلاقيه حد احسن منه, توقف حالها ليه اللي يسال اه انا مش مخطوبة
ولو ظهر المراد ادلق الواد بأي تلكيكة و خلاص
احيانا كتير بنشوف ناس بتعمل اشياء بنستغرب ونقول ليه هما بيعملو كده لكن بيتضح بعدين اننا اسئنا فهمهم وتصرفهم هذا كانت نتيجة ظروف وملابسات ,يجب ان يكون فيه حسن ظن والله اعلم بعباده
السلام عليكم
يصراحه انا مش عارفه البنت قصدها ايه لكن الدبله طبعا مهمه للراجل والبنت بس ادعيلنا نلبسها
و الله انا كنت فاكر ان اجابة السؤال دي عند البنات و كنت محتار اوي من اي بنت ترتبط و تعشم الي معاها و بعدين تصاحب عليه او تعرف غيرو و تجرح و تعقد الشخص المرتبطه بيه و ممكن برضو ولاد يعملو كده بس من البنت بتجرح اكتر لما يكون الانسان الي معاها مخلص جداا ليها عمري ما فهمت الموضوع ده ..ده جرح ما يتنسيش
تحياتي
مممممم...واضح يا "يانتظار مؤقت" ان الموضوع مس عندك حاجه...
بس صدقني...مافيش فرق بين ولد وبنت في الحاجات اللي تجرح
كلنا بني آدمين وكلنا بنحس وعندنا قلب ودم
يعني اللي يشوف كلامك لأول وهلة يفتكرك بتقول انه عادي ومتوقع ان ولد يجرح بنت بس لما تيجي من البنت بتبقى صعبه..
وماعتقدش طبعا قصدك كده...انت بس متأثر..
ربنا يكون في عوم الجميع ويرزقنا بالصلاح في كل شيء..
ياريت ماتكنش زعلت مني
لا مش عادي طبعا
انا في اعتقادي ان اللي تعمل كده
او يعمل كده
مش شايل صاحب او صاحبه الدبله في قلبه
يادوب عند طرف الصوباع وبس
حاجه غريبه
ده موجود فى مصر بجد
عزيزتى
مستغربه ليه المراه تقبل برجل الى ان ياتى الرجل التى تريد
وعصفور فى اليد مضمون الى ان ياتى اى عصفور احلى منه من الشجره
ودلوقتى اللى تتخطب وتمشى مع واحد واللى تتخطب وترضى باى واحد واللى تتخطب وتتمنا واحد تانى
على العموم الرجل برضوا يخطب ويمشى ويلعب بس المراه مش عارفه ان غلاوتها فى حيائها وحفظها على نفسها وكل ما تحافظ على نفسها كل ما تكون اغلى
سلام
والله يا آنسة داليا ده شيء طبيعي جداً من واحدة متقدرش المسئولية أو تعرف معنى الصدق والإخلاص إيه وللأسف فيه بنات كتير أوي وشباب كمان عندهم نفس الموضوع
أنا بصراحة مش عارف الشباب والبنات دول حصل لهم إيه وليه هما كده معندهمش أي إحساس بالمسئولية
المهم ربنا يهديهم ويعقلوا
NOSHA
طبعا تلاقي الهانم رايحة مشوار كده ولا كده ومش معرفة اللي خارجة معاهم انها مرتبطة !! بس ربنا مش هيسيبها ،
يا إما خطيبها هيسيبها يا إما بيعمل زيها بالظبط ،، يمهل ولا يهمل ...
نورتي من جديد وبوست هايل بس بيوجع
ميمي
http://mimayaa.blogspot.com/
مع احترامى ليكى..ايوة انتى مكبره الموضوع..و مدياله اكبر من حجمه
اولا ان بعض الظن اثم
ثانيا دعى الخلق للخالق
ليه كل التحامل الفظيع عليها ؟؟..انتى و انا و هما مايعرفوهاش علشان نحكم عليها
لا و الاكتر من كده ان فيه بعض الاخوه اتهموها فى اخلاقها
اومال ماشدش انتباهك قبل كده واحد خاطب و خالع دبلته علشان قاعد مع واحده تانيه؟؟
و لا ماشدش انتباه زوج بيخون مراته و رمى دبلتها من زمان؟؟
انا اسفه بس بجد انا دمى اتحرق من التحامل الفظيع على موقف لا انتى و لا انا و لا انتم عارفين ابعاده و ظروفه
اخيرا
الاختلاف فى الرأى لا يفسد للود قضيه
تحياتى
Post a Comment