التاج التاج التاج
محمد سمير بعت لى التاج ده .. هاجاوب عليه و امرى لله
انت مين؟
انا داليا
مين اكتر 6 اشخاص بتحبهم؟
والدى و والدتى و اخواتى الاتنين و ابن اخويا الصغنن ..عثل اوى لسه يادوب ماكملش شهر ... و طبعا فاطمه انتيمتى
انت سعيد؟
ده بيتوقف على معنى السعاده اللى بيختلف من شخص لاخر
الحمد لله انا سعيده جدا و اكتشفى ان السعاده فى الرضا و كل اللى ربنا قاسمهولى هيكون و المفروض ارضى و احمد
ربنا على كل حاجه
لو اجتمعت انت وحسني مبارك في غرفة واحده؟
هاخليه يكتب كل الفلوس اللى عنده للناس الفقرا و كمان هاخليه يتنازل عن الحكم
لو معاك مليون ونص جنيه......تعمل بيهم ايه؟
مليون و نص ؟؟؟ مش عارفه هاعمل ايه بس اكيد اول حاجه هاعملها هاجيب لاب توب و عربيه و شقه على البحر
:) :) :)
لا طبعا بهزر .. بس مليون و نص ياما اوى ممكن اعمل بمليون جنيه مشروع و النص احطه فى البنك و العائد بتاعه يبقي لصالح الايتام
بتحب مصر؟
طبعا بحبها
بتحب البنات؟
اه طبعا بحب البنات مش عشان انا بنت و بس بس لان فعلا البنات يستاهلو يتحبو و على رأى سعاد حسنى
البنات البنات الطف الكائنات .. قولو يا بختنا اد ايه كلنا فرحانين اننا اتولدنا بنات
انت مسلم؟
طبعا و الحمد لله
ليه؟
غريبه اوى ليه دى ... عشان انا اتولدت فى نعمه غيرى مش لاقينها انى اتولدت فى اسره مسلمه
مين اكتر شخصية ما تقدرش تستغنى عنها في حياتك؟وليه؟
بصراحه يعنى والدتى هى اكتر واحده ماقدرش استغنى عنها .. ربنا يخليهالى و يطولى فى عمرها ليه دى بقي ؟؟ لانها امى
ايه اكتر موقف محرج اتعرضت ليه في حياتك؟واتصرفت ازاي؟
اكتر موقف محرج؟؟....مش فاكره
ايه الأمنية اللي بتدعي ربنا دايما انه يحققها لك؟
انى اقرب من ربنا اكتر و ادخل الجنه
تمرر التاج دة لمين؟
جينا وقت الجد بقي
16 comments:
ألف ألف ألف مبروك بقدوم المولود الجديد
أكيد عبد الرحمن عثل زى عمته
:P
السلام عليكم ورحمة الله وبركاتة
ازيك يا داليا ...بقى هتخلية يكتب كل الفلوس الى علية للفقراء ويتنازل عن الحكم
؟؟؟
ههههههههههههههههههههههه
ربنا يخليلك والدتك واجباتك جميلة اوى
بوستك ( البوست بتاعك ) جميل جدا واجاباتك حلوه اوي لكن موضوع الريس ده مش وسع شويه
ولا انا عشان قعدتك معاه هاتعتمدي اني كل شويه هاتدخل
لا مش عايز مشاكل مع حد
انت عارفه الضغط عليا بقى جامد ومش عايز حد يمسك عليا غلطه
ربنا يخليلك مامتك ويحققلك كل امانيكي وانشاء الله ربنا يجمعنا ف الجنه
وبعدين هو انا اللي اسمي مكتوب ف التمرير ده؟؟؟
وبعدين هو مش ممكن التاج يتقطع وانتي بتمرريه وتبقى هجمه مرتده؟؟؟
سؤال يعني
منـــــــــــــــــــــــك
للــــــــــــــــــــــــه
ياللي كنت السبب
:'(
ماقصدش حاجه للاخ محمد سمير بس انا عليا تاجات متلتله-حلوه تاجات متلتله دي- ماجاوبتش عليها...ووجود ده معناه تاجات اكتر واكتر وواجابات بالهبل
عااااااااااااااااااااااااااااااااااا
:'(
ايوه يا عم المتوج مبروك التتويج
وطبعا سعادتك هتغصبيه يكتب املاكه بالورد والزهور صح
ربنا يخليلك صاحبتك فاطمه
وبعدين ازاي مش فاكره موقف محرج في حياتك انتي ناسيه لما سلفتك عشره جنيه ومرجعتيهمش لحد دلوقتي انا عايز فلوسي
ثانيه واحده ايه ده انتي بعتيلي التاج يا مصيبتي
عموما ماشي بس اصبري بقى لما البوست الجديد يبرد شويه
تحياتي يا ورده
سلااااااااااااااااااااااام
ههههههههههههههههه
مش عارف مين اللى اخترع التاجات ده بس
ربنا يسامحة مطرح ما هو قاعد
مليون ونص
موش معنا يعنى مليون ونص
بس ده تاج صغيور اوى
علي رأي عبدو
موضوع الريس ده واسع شوية
ولا ده من باب أن كيدهن عظيم ؟؟؟!!!
تاج ظريف
3abdo me7tas
اه عبد الرحمن عسول اوى ... هابقي اصوره كام صوره كده و انزلها على البلوج
-----------------------------------
.:.-=- ELGaZaLy-=-.:.
ايوه يكتب كل فلوسه للفقرا معلش يعنى فيه عالم مش لاقيه تاكل كده حرام يعنى
ربنا يخليك و يخلى لك والدك و والدتك
-----------------------------------
ولــــــو
هههههههههههههههههههههههههه
لا ماتقلقش مايخلصنيش برضه انى اعملك مشاكل
ربنا يخليك
بص انت ركز معايا كده عشان مايتقطعش فى النص و تبقي هجمه مرتده
-----------------------------------
warDaya
ماليش دعوه ياختى التاج بتاعى يتجاوب الاول
-----------------------------------
الشنكوتي الكبير
هاخليه يكتب املاكه للشعب بطريقتى بقي
" انت ناسي " ان كيدهن عظيم
بلاش احراج بقي فى البلوج يا ايهاب
العشره جنيه هبعتهالك فى الدى اتش ال
و بعدين انا عملت نفسي ناسيه بتفكرنى ليه بقي و تسيح لى كده على الملاء
التاج ترد عليه ... حلوه البوست يبرد دى هو شكله طالع من الفرن ولا ايه .. طيب تبقي هات حته
-----------------------------------
ياسر سليم
انا لو شوفت اللى اخترع التاج ده هقتله .. انا مش بشوف غير اللى بيمررهولى بس
-----------------------------------
مدونة كسبان
اومال انت عاوزه يبقي اد ايه
كده كفايه اوى
-----------------------------------
BinO
الريس ... بس يقع تحت ايدى و اتفرجو بقي ايه اللى هيحصل
هاخليه يكتب كل املاكه للشعب الفقران
اكيد ان كيدهن عظيم .. ده امر مسلم بيه
:P
الأسئلة صعبة شوية يا داليا بس انا عايز اقولك اني اجتهدك وجاوبت علي الأسئلة ويارب اجيب مقبول بالميت علي العموم انا فيه فكره عايز اعرضها عيك بس لما تتبلور وتكمل هقولك عليها
مع السلامة
طبعا انتي هتطلبي منه انه يتنازل عن كل الفلوس للفقراء
دة طبعا على اساس انك هتكونوا قاعدين لوحدكم وفي ايدك مدفع رشاش بتهدديه بيه
ههههههههه
اجابات دمها خفيف جدا
تحياتي واحتراماتي
اجاباتك لذيذة اوي ياداليا...وسريعة اوي بردو
بس في موضوع الريس على رأي سمير ايه الثقة اللي انتي فيها ديه وبعدين عايزة تضيعي شقى الراجل العمر ده كلة
تحياتي
محمد سمير
دايلا ميرسى لزيارتك الجميلة دى
تقبلى تحياتى
هاللو ياجميله
مرسي اولا علي التاج حرد عليه في اقرب وقت اوكي؟وحشتيني اوي و الله
يارب تكوني بخير و عال العال
بشكرك تاني عشان التاج ده عرفني بشخصيتك الجميله اكتر و اكتر و عجبني ردودك لأنها بتقربنا منك و من شخصيتك
تحياتي ليكي ياقمريه
Post a Comment