هى و هو

هى
و انا قاعده اذاكر فى امان الله و فاتحه مذكره الفيزيا قدامى و القلم و الورق عشان احل المسائل بينى و بينكم انا دماغى هنجت من كتر التفكير و المذاكره بس هاعمل ايه بقي لازم انجح دى اخر سنه و ان شاء الله هاجيب مجموع حلو
الاقى الراجل جارنا مشغل اغنيه ام كلثوم
" يا ناسينى و انت على بالى و خيالك مايفارق عينى"
اتنرفزت قوى من الاغنيه و كنت لسه هاروح اقول لبابا يخبط عليه عشان يوطى الصوت شويه .. مش كده يعنى دى ثانويه عامه يا نااااااااس
و بعدين لاقيت نفسي سرحت مع الاغنيه و قفلت مذكره الفيزيا
و افتكرت حبيبي .. ياترى هو عامل ايه دلوقتى.. احنا اتفقنا ان احنا مش هنتكلم فى الفتره دى عشان احنا الاتنين ننجح و نجيب مجموع حلو .. ياااااااه الواد ده انا بحبه اوى ..
" لا عنيا بتهواها النوم.. ولا بخطر على بالك يوم"
لا انا متأكده انى بخطر على باله على طول كل الايام و كل الساعات اكيد هو مش بينسانى.. وقعته سوده لو نسانى لحظه
" يا مسهرنى "
هو من ناحيه مسهرنى .. هو اه مسهرنى مسهرنى الليل بطوله.. مش كفايه عليا الثانويه العاميه
" يلا يا دودى عشان تتغدى"
ايه ده صوت ماما.. هاروح اتغدى.. يارب لما ارجع الراجل جارنا ميكونش قفل الاغنيه
"حاضر يا ماما انا جايه اهو"
طلعت جرى عشان اكل.. انا جعانه اوى.. مش عارفه ليه كل اما افكر فى الواد ده اجوع اوى كده!!!


هو
يادى القرف زهقت من المذاكره دى .. خلاص بجد مش عارف اعمل ايه الامتحان فاضل عليه ايام.. انا عصرت المذكره و الكتب الخارجيه و نماذج الامتحانات .. حتى كتاب الوزاره بس بقي هنعمل ايه فى بعبع الثانويه العاميه .. قرف
تسللت الى مسامعى اغنيه عبد الحليم
"لست قلبي انا اذن انما انت قلبها"
اه طبعا قلبها هو انا ليا غيرها.. وحشتنى اوى البت دى بس اعمل ايه بقي انا اديت لها كلمه اننا مش هنكلم بعض ايام الامتحانات عشان ننجح و نجيب مجموع كبير.. لازم اطلع راجل قدامها و مارجعش فى كلمتى ابدا.. " مش زى عبد الفتاح القصرى فى الفيلم"
بس هيه وحشتنى
" لست قلبي انا انما انت خنجر بين الضلوع"
خنجر ايه يا عم حليم ده احلى قلب و احلى حب عيشته
تعرف يا حليم .. استنى بس اما اقفل مذكره الرياضه دى عشان الالهام يجى لى
ولا اقولك يا حلم انا هارميها خالص
بص بقي يا سيدى البت دى اصلا انا بحبها جدا و هيه قاعده فى قلبي و معششه فيه يعنى مش خنجر ولا حاجه دى البلسم اللى بيداويه يا راجل
" ولا يا احمد انت بتكلم نفسك ولا ايه"
" لا يا ماما ده انا بذاكر بصوت عالى"
عاجبك كده يا حليم ادينا اتفضحنا
" طيب وطى صوتك يا اخويا اختك فى الصاله مش عارفه تذاكر"
" حاضر هاسكت خالص اهو"

" و ادى مذكره الرياضه"