عربي لو سمحت

ماتيجو نتكلم عربي شويه
طبعا فيه حد هيقولى اومال احنا بنتكلم ايه هندى يعنى ولا ايه
لا انا اقصد نتكلم عربي و مايكونش فى كلامنا اى كلمه غير العربي خاصه الانجليزى اللى فرض سيطرته و احتلاله على عقولنا
طيب ايه المشكله لو خلينا كلامنا كله من غير اى كلمه غير العربي ... انا شايفه ان اللغه العربيه غنيه و مش محتاجه جنبها اى لغه تانيه عشان نعرف نعبر براحتنا و العاميه مليانه تعبيرات و الفاظ سهل اوى نستخدمها يعنى بدل ما نقول اوكى .. نقول ماشى او طيب او حاضر .. شوفتو ازاى ان فيه بدائل فى اللغه العربيه و اكتر كمان من الانجليزى
امثله زيها كتير انا بس بقول ده على سبيل المثال لا الحصر

حافظ ابراهيم قال عن اللغه العربيه
انا البحر فى احشائه الدر كامنا فهل سألو الغواص عن صدفاتى

طبعا انا مش بدعى انى بتكلم عربي ميه فى الميه بس على الاقل بحاول و بتلخبط اوى لما اقول كلمه انجليزى عن غير

قصد لانى سعات كتير بكون بكلم ناس مستواهم اقل منى او ناس كبيره المفروض يكون كلامى ليهم فيه احترام و من ضمن الاحترام ده انى اتكلم بلغه هما يفهموها
تعرفو انا بخجل من نفسي جدا لما اقول كلمه انجليزى فى وسط كلامى و سعات مش ببقي لاقيه معنى بالعربي ليها .. تخيلو؟
احساس صعب اوى لما تبقي لغتك هى لغه القرآن و ثريه بمفردات و تعبيرات مش موجوده فى لغات تانيه و تحس انك بتغرق وسط شويه مفردات انجليزى عارفهم و نسيت معناهم بالعربي
مش برضه حاجه تزعل ؟؟؟
ياريت يا جماعه كلنا نهتم باللغه بتاعتنا اللى هى جزء مننا كلنا ...و ناخد كورسات لغه عربيه .. ماحدش يستهزأ ... كلنا بنهتم باللغه الانجليزيه او اللغات التانيه و بنجرى و ندفع فلوس اد كده عشان نتعلم انجليزى طيب ليه مش نتعلم العربي الاول.. ندور جوه اللغه العربيه عن الدرر .. نقرأ كتير و نشطب من استخداماتنا اليوميه الالفاظ الغربيه اللى مالهاش اى علاقه باللغه بتاعتنا ... احنا لغتنا اقوى و اثرت و آثرت لغات كتير و طبعا الانجليزى اولهم كلمات كتير زى ليمون و سكر و قطن و حاجات تانيه كتير

احنا المفروض نثق فى لغتنا و فى نفسنا اكتر من كده ... لغتنا قويه و كافيه ... يكفى ان الله اختارها عشان تكون لغه القرآن و يكفينا شرفا ان تكون لغتنا الام هى العربيه

" وهب الله اللغة العربية مرونة جعلتها قادرة على أن تدون الوحي أحسن تدوين.. بجميع دقائق معانيه ولغاته، وأن تعبر عنه بعبارات عليها طلاوة وفيها متانة".د. جورج سارتون