هو ده برضه التوب لوب

كنت وعدتكم فى بوست قبل كده انى هتكلم عن الناس اللى شوفتها فى حياتى و اثرت فيا او على الاقل ماقدرتش انساهم

النهارده هتكلم عن شخص تانى من غير مقدمات كتير انا هبدأ على طول

الفتره اللى فاتت اشتغلت فى شركه كمبيوتر و بطبيعه الحال كان لينا جناح فى معرض كمبيوتر .. طبعا التعامل مع الناس فى المعارض بيبقي مختلف تماما و بيبقي معظمهم ماشتغلوش على كمبيوتر قبل كده و لازم واحده واحده يفهمو الفرق بين البروسيسور السيليرون و الكور تو ديو .. ده غير العميل اللى يطلب منى انى اكتب له مكونات الكمبيوتر بالعربي ... دى امتحانات الترجمه عندنا فى الكليه كانت اسهل

اكتر حاجه غريبه صادفتها فى المعرض هو التوب لوب .. ايوه اقصد يعنى اللاب توب .. مش فاهمين طبعا .. اوك انا هاشرح لكم .. جه واحد شكله بسيط جدا و لابس ميرى تقريبا كده شاويش و على وشه ابتسامه غريبه و اسنانه تكاد تكون سودا من كتر الدحان و الشاى و شاور على اللاب توب لاقيته بيقولى

مش ده برضه التوب لوب -

ايوه يا افندم حضرتك تقصد اللاب توب -

ايوه يعنى بكام ده -

ده ب 3500 -

اصل انا ابنى طلع من المتفوقين و الوزاره اديت له واحد زى ده و انا عايز ابدله بواحد من العاديين دول (يشير الى الكيسات )واخد الفرق-

اوك حضرتك تجيبه و نشوفه و نبدله لحضرتك-

بس هو زى ده بالظبط كده -

ايوه ماهو حضرتك ده فيه منه مودلات كتير .. ياريت حضرتك تجيبه معاك عشان نشوفه بكام و نبدله -

مشى الراجل و هو مش مقتنع ابدا انه لازم يجيبه و انه زى ده بالظبط كأن هى شركه واحده احتكرت صناعه اللاب توب فى العالم كله

بعدها بتلات ساعات رجع تانى نفس الشخص بس طبعا ماكنش لابس ميرى .. انا فى الاول استغربت شكله و لاقيته بيبتسم ابتسامه (انا اللى جيب الصبح) بسرعه افتكرته طبعا من شكل اسنانه المقزز و لاقيته جايب ورق من اللاب توب و بيقولى هو شبه ده كده الورق ماكنش فيه اى حاجه عن امكانيات الجهاز خالص .. زميلى فى الشغل قعد يتكلم معاه و يفهمه و يقنعه انه لازم يجيبه

بعد ما مشى قعدت انا و زمايلى فى الشغل نتكلم عن الراجل ده و ابنه المتفوق و اد ايه هو بسيط جدا

مش كان الاولى ان الوزاره تدى فلوس للناس الغلابه دى بدل اللاب توب .. يعنى هما خلاص معاهم كل حاجه و اللى ناقصهم اللاب توب!!!!