الناس وانا

ازيكو ؟؟ واحشينى اوى .. انا عارفه انا بقالى كتير مش بدخل و مش برد عن حد و اكيد انتو مخنوقين منى و اكيد فيه ناس فقدت الامل من كتر ما بتدخل البلوج و مش بتلاقى بوستات جديده

النهارده انا قولت ادخل اتكلم معاكو شويه .. وحشنى اوى الكلام هنا .. له طعم مختلف عن اى حاجه تانيه ... انا عن نفسي بحبه و بعدى كان بسبب .... ولا انتو عارفين .. اكيد حالتى النفسيه ماكنتش مستقره و اكيد هتقولولى انتى غلطانه لما تبقي متضايقه اكتبي و الكلام ده .. بس انا مش جايه النهارده عشان اتكلم و اقولكو انى كنت متضايقه و اقعد اشكى و اعيط و الحاجات دى... انا بقول قدر الله و ما شاء فعل و الحمد لله على كل حال

اه صحيح نسيت اقولكو انى اشتغلت و الشغل كان سبب من ضمن الاسباب اللى خليتنى ابعد عن البلوج او النت بصفه عامه

انا عاوزه اتكلم النهارده عن الناس .. اللى حوالينا .. اللى بنشوفهم صدفه و نتمنى نقابلهم تانى ... و اللى بنشوفهم كل يوم بحكم ظروف حياتنا

اول حد هتكلم عليه هى سيده عجوز شوفتها بالصدفه فى محطه الترام كانت بتحاول تطلع على رصيف الترام فى محطه الرمل و رغم انه مش عالى بس هى يا عينى ماكنتش قادره تطلع و عماله تخبط على ضهر بياع واقف على الرصيف و هو مش واخد باله انا قومت و اخدت ايدها و عديتها الرصيف و سألتها اذا كانت هتركب ترام قالت لى لاء انا هاخد تاكسي ينزلنى قدام البيت .. وقفت فى الشارع و شاورت لتاكسي و هى كانت ماسكه فى ايدى جامد و احنا واقفين قالت لى ربنا يكرمك و يرزقك وبعدين قالت لى ياريت مرات ابنى كانت زيك .. المهم هى ركبت التاكسي و مشت و سابت لى علامه استفهام كبيره اوى ... ياترى انا كويسه لدرجه انها تتمنى مرات ابنها زيي .. دى ماتعرفنيش و ماشافتش منى غير انى عديتها الشارع و وقفت لها تاكسي... مش عارفه ؟؟؟ يمكن تكون شافت فيا اللى مش قدرت اشوفه

لسه كلامى ماخلصش .. عندى كلام كتير .. هاكلمكم عن الناس اللى حواليا بس البوست الجاى