يا دبله الخطوبه عقبالنا كلنا

النهارده كانت خطوبه فاطمه صديقتى الانتيم .. من امبارح و انا معاها بنخلص الحاجات اللى ناقصه و النهارده روحت لها بعد الضهر و كنت معاها فى كل لحظه ... طبعا فاطمه دى حته منى و لازم ابقي معاها فى يوم زى ده من اوله ... كانت زى القمر النهارده و خطيبها كمان ما شاء الله عليهم ربنا يحميهم و يتمم لهم بخير ... الخطوبه كانت على الضيق اوى فى البيت بس كل الناس كانو فرحانين لها و انا اكتر واحده كنت حاسه بيها ... لما لبست الدبله كانت منوره ايديها ... كان يوم جميل بس عدى بسرعه اوى ... فى الخطوبه انا اللى قدمت لها الشربات .. اتخانقت مع بنات العيله كلها بس انا اللى فوزت و اخدت الصينيه اللى عليها كاسين الشربات و كانت الكاسات عاليه و انا بحتاس لما اشيل حاجه زى دى بس الحمد لله مش وقعو منى احسن شكلى كان هيبقي وحش اوى .. كاسين الشربات بلونه الاحمر و الدهبي اللى فى الكاس كنت حاسه انهم بيرقصو بجد بيرقصو من الفرحه و هما فى ايدى .. او يمكن صوت نبضى العالى اتنقل لهم من ايدى ... يااااااااااااااه كان يوم روعه.... و هما بيوزعو الجاتوه دخلت شيلت ليا انا و فاطمه قطعتين جاتوه شوكلاته على جنب ... بعد ما رجعنا من الكوافير و فى انتظار العريس كنا قاعدين لوحدنا انا و فاطمه .. كنت متضايقه و مخنوقه بس مش عارفه من ايه و عماله اقول لنفسي مش وقته يا دودى تضايقى فى يوم زي ده .... فاطمه اخدت بالها انى متضايقه و سألتنى مالى ماكنش ينفع اقولها انى متضايقه و كمان مش عارفه من ايه .... قولت لها ان رجليا وجعتنى من الكعب العالى عشان واقفه بيه طول الوقت و انا معاها فى الكوافير .. اليوم كان روعه و كل قرايبها و صحابها قعدو يقولولى عقبالك .... مش عارفه هابقي مبسوطه زى فاطمه فى اليوم ده ... انا تعبت كتير فى حياتى و نفسي قلبي يرتاح ... للاسف اضطريت اروح قبل ما خطيبها يمشى لانى كنت لوحدى و ماكنش فيه حد يوصلنى ... و انا ماشيه سلمت عليها و حضنتنى حضن كبيييييييييييير اوى كنت هاعيط و انا فى حضنها مابقتش عارفه اقول حاجه بس هى كانت حاسه بالكلام الكتير اللى كان جوايا ... انا بحبها اوى ربنا يسعدها