اول مره

بصراحه طول اليوم متضايقه و متنرفزه على الاخر كل حاجه فى حياتى مضايقانى و اعصابي بايظه جدا قولت مافيش غيرها و كانت اول مره اعملها هى اكيد هتخلينى اتخلص من كل الزهق و بوزان العصاب ده ... هى هتريحنى كتير .. انتهزت فرصه ان كل اللى فى البيت نامو و دخلت معها الحمام كانت دايما بتغرينى بجسمها الابيض الرفيع الناعم مسكتها بأديا اللى بتترعش و انا مرعوبه و خايفه جدا حد يقفشنى معاها .. حطيتها بين شفايفى و مسكت الولاعه و ولعتها .. ماحدش يفهم غلط يا جماعه انا بتكلم عن سيجاره السيجاره اللى سرقتها من علبه بابا من كام يوم جه وقتها دلوقتى .. ولعتها دى سهله اوى اخدت منها نفس صغير و طلعته تانى.. كنت ببوسها بالراحه اوى و هى كانت بتدينى دخانها بكل رضا عشان انفخه تانى فى الجو كنت بشرب كأنى محترفه مش اول مره .. ماكنتش اعرف انها سهله كده مش زى ما بيجيبوها فى الافلام العربي.. و الدخان بتاعها مش بيضايق زى ما بيضايقنى لما حد يشربها قدامى.
طلعت الدخان تانى بعصبيه بينى و بينكم هى ريحتنى شويه .. اهو اى حاجه اطلع فيها زهقى بدل ما اقعد اعيط او حتى اتكلم مع صحابي على النت و يعصبونى اكتر بس ايديا كانت بتترعش اوى .. يمكن عشان خايفه حد يصحى و يقفشنى..
تصدقى يا بت يا دودى شكلك حلو اوى و انتى بتنفخى الدخان كده .. ناقص لك بس الجوانتى الاحمر الساتان و تبقي زى مارلين مونرو ...ولا احلى منها كمان ايه يعنى مارلين دى ولا عشان شعرها اصفر شويتين عادى يعنى اروح من بكره اخلى شعرى اصفر و ابقي احلى منها .. سيبك دلوقتى من مارلين و خليكى فى السيجاره الجميله دى ..دى حلوه اوى .. مش بتعمل اى حاجه فى الدماغ اساسا عادى خالص اهو دخان بيدخل و يخرج و خلاص .. خلصت السيجاره للاسف رميتها و فتح الشباك على اخره و لسه بفكر اطلع اجيب سيجاره تانيه من علبه بابا و بعدين قولت لنفسي بلاش احسن بابا ياخد باله و الحكايه تتعرف... بس و ايه يعنى ماحدش هيفكر اساسا ان دودى البنوته العسوله دى هى اللى تكون سرقت السيجاره من علبه بابا ... لو بابا لاحظ ان سجايره ناقصه اكيد هيقول اى حد من اخواتى الصوبيان .. دى ميزه انى ابقي بنت نياهاهاهاها
هاطلع بسرعه اجيب واحده تانيه عشان دى عجبتنى اوى
يالهوى... الباب اتفتح

.. ماما

.. ياخرابي روحت فى داهيه

.. الحمام ماليان دخان

.... و

!!ايه ده يا داليا

.. انتى لسه نايمه .. انتى ماعندكيش كليه ولا ايه
لا يا ماما مش هاروح النهارده
طيب كملى نومك بقي

الحمد لله انه كان حلم