الم يحن الوقت بعد؟؟

ومالو لو ليله توهنا بعيد و سيبنا كل اللناس انا يا حبيــ
ضغطت فى عصبيه على الموبيل
- الو
- الو
- ايوه ...مين
..(و هى تقول فى قراره نفسها .. خلص يابنى انا مش فاضيه لك لسه ورايه غسيل و مواعين و عيال جايه من المدرسه و الراجل زمانه جاى و ...)
خرجت من افكارها و هو يرد قائلا
-انا على يا اميره
- على مين ؟؟
( قالتها وهى تعى جيدا انه هو .. ذلك الماضى الذى طالما حاولت نسيانه )
- يااااااااااه يا اميره بسهوله نسيتينى كده
- على .. ماتنساش ان انا دلوقتى ست متجوزه
- انا عارف .. انا بس عاوز اسلم عليكى
- مابقاش من حقك اى حاجه حتى السلام ... كنت فين السنين اللى فاتت كلها.. ولا اقولك مش وقت عتاب دلوقتى
- اميره انا بحبك
اسبلت اميره جفنها لثانيه و هى تعود بذاكرتها لذاك الماضى .. كانت تتمنى ان تسمع تلك الكلمه ولكنه ابي بغطرسته و خشونته .. ابي ان يعلن عن حبه الصارخ فى قلبه و تركها وحدها و اعلن رحيله من حياتها نهايه لما لم يبدأ
- ايه اللى انت بتقوله ده .. بتحبنى .. كان فين الكلام ده من زمان .. كان فين لما كنت هابوس ايدك عشان تحس بيا و تحبنى .. ماتقولش اى حاجه
- انا لفيت و تعبت و رجعت لك
- لا انت مالفتش ولا تعبت ولا راجع عشانى ... انت راجع عشان نفسك عاوز ترضى غرورك عاوز تذلنى و تكسرنى و تبوظ لى حياتى .. انسي انا مابقتش اميره اللى كانت بتحبك زمان مابقاش فى حياتى غير جوزى و عيالى و بس.. انت جاى تبوظ لى حياتى ليه ؟؟؟
- بتحبيه يا اميره ؟؟
صمتت و كادت ان تقول لا لولا ان لسانها رفض ان يطاوعها و قالت فى تردد
- ده جوزى و ابو عيالى
و اكملت بعد ان شعرت انه بدأ يلعب بمشاعرها كما فعل من سنين
- اقفل دلوقتى و ماتتصلش تانى ... انا اه ماغيرتش نمرتى خالص بس لو اتصلت تانى هاغيرها
- اسف يا اميره بس بجد هتوحشينى اوى
-وانت مش هتوحشنى .. يلا سلام
و اغلقت الخط بعصبيه اكبر بتكثير من تلك التى بدأت بها المكالمه .. دخلت الحمام لتزيل عنها غبار الذكرى الذى كاد ان يسيطر عليها كليا و مع كل قطره ماء تنزل عليها كانت تمسح ذكرياتها
خرجت من الحمام .. تنشفت و تعطرت و ارتدت اجمل ما لديها و اتصلت بمطعم السمك و طلبت غداء فاخر لها و لزوجها اما اولادها فأمرت اختها بأحضارهم فى البيت عند امها
دخل زوجها كعادته منهك من العمل رحبت به بابتسامه على غير عادتها و قبلت خده و تعجبت كيف لم تشمئز من حبيبات العرق على وجهه؟؟ ابتسم هو بدوره و قال
- ايه الرضا ده؟؟
وتنبه ان البيت هادئ فسأل عن الاولاد فردت بسرعه
- بعتتهم عند ماما .. هادخل احضر لك الحمام عشان تاخد دش
و مضت فى دلال انثوى و هى تتعجب ما تفعله .. كيف لم تشعر انها تحبه قبل الان .. ان تلك المكالمه اثارت فيها الثوره على وضعها الذى لم يتملل و لم يشكوه زوجها و لكنها لم تريحه ليس لسبب الا انها تعتقد انه تزوجها دون حب
وكيف لم يحبها و هو يبذل كل ما لديها لاسعادها و لا يتأخر عنها فى اى مطلب لها كيف لم يحبها و هو اول من يكون جوارها اذا مرضت او حزنت .. كيف لم يحبها و هو الحضن الدافئ الذى تلجئ اليه وقت شدتها .. كم كانت غبيه .. نعم غبيه لانها لم تحبه طوال السنوات الماضيه فقت كانت تؤدى دور الزوجه بكل تفانى ولكن دون ذره حب ... قالت فى نفسها لقد حان الوقت لتتخذ حياتها شكلا جديد .. نظرت اليه بعد خروجه من الحمام و قالت بعين يملؤها الحب

- انا بحبك اوى

و رمت نفسها فى حضنه و بكت ... هو يعلم جيدا انها حين تبكى تكون صادقه .. فى قمه صدقها و ان دموعها ليست كدموع باقى النساء

مسح دموعها و ضمها الى صدره و رد قائلا

-و انا كمان بحبك يا اميرتى

تبسمت وطلبت منه ان يغفر لها ذلاتها و معاملتها الجافه لها فقال و ببساطه

- انا اصلا مازعلتش منك .. مابعرفش ازعل منك ..حد يزعل من اميرته

بكت اكثر .. بكت بمراره لانها لم ترى فيه الحب كل الحب قبل الان و اغمضت جفنيها ونسيت كل شئ ... نسيت الدنيا و مافيها و تركت نفسها تبكى بين احضانه